على مدار العام, كنت اخطط لرحلات بالدراجة لعدد من دول العالم اللي زرتها مسبقا ولكن تركيزي كان منصب على الدول اللي ممكن اقود رحلات فيها بشكل كامل مثل تونس الجزائر المغرب ودول اسكاندنافيا! وهذه بالتحديد اللي ركزت فيها أكثر شي لأني رحتها مسبقا زيارات تخطيط مسار واستطلاع مرتين! ولهذا السبب كان مهم اركز واروج لها بشكل مكثفمع العلم اني روجت لها شوي متأخر!
من حسن الحظ ان الرحلة كاملة تم انجازها بدون اي تأخير او تعطيل او تغيير في الجدول ولله الحمد بالرغم من التحديات والصعوبات, والشي الأصعب في هذه الرحلة انها ماكانت رحلة جماعية بمعنى ان صعوبتها لأني كنت اقود شخص واحد فمن المهم اني اكون ملازمه دايما واتأكد ان كل شي ماشي او انه ما ضيع الطريق او طاح او سوا حادث لاقدر الله!. وعادة انا ماحب اطع رحلة الا اذا كان على الأقل عدد المشاركين يفوق ال3 الى 5 اشخاص ولكن لما كنت في الدوحة وشقت اصرار نبيل انه يسوي هالرحلة وفي نفس الوقت حسيت اني ابي اطلع واغير جو قلت معليش! التحدي الاخر هو ان نبيل كان قليل الخبرة في مجال الادفنشر. وكنت قلق جدا على سلامته وبصراحة كنت متشكك انه يقدر يكمل للأخير ولكنه ما شالله عليه ابهرني وكمل للأخير وكان حتى أفضل من اللي محسبوبين علينا مغامرين!
الشي الآخر اللي خلاني مبسوط في هذه الرحلة هو اني أخيرا قابلت صديثق المراسلة من سنة 1992 ومع الايام قطعنا تواصل حتى جات صرعة التواصل الاجتماعي وتواصلنا مرة ثانية واثناء الرحلة حبيت اعرف وين ثريته ومن حسن الحظ انه في اقصى شمال النرويج فغيرت المسار شوي علشان نوقف في مدينته سورتلاند وكانت فرصة فعلا تستحق اننا نغير المسار من اجلها, ولما اجتمعنا تفاجأت انه مازال محتفظ بكل الرسايل اللي ارسلتهم له وجايبهم معاه! وهذه القرية اعتمدتها بشكل رسمي في المسار في المرات القادمة ان شاء الله
والحين بما ان الرحلة حققت الهدف وخلصت بنجاح! وين تعتقدون الرحلة القادمة؟ الجزائر؟ المغرب؟ او تونس؟